డా. గరికిపాటి గురజాడ

డా. గరికిపాటి గురజాడగారు బ్రహ్మశ్రీ గరికిపాటి నరసింహారావు, గరికిపాటి శారద దంపతుల ద్వితీయ కుమారుడు. వీరు పుష్య శుద్ధ సప్తమి 1992 జనవరి 12, వివేకానంద జయంతి పండుగ రోజున, తూర్పుగోదావరి జిల్లా, రాజమండ్రిలో జన్మించారు. వీరు తెలుగులో ఎం.ఎ, ఎం. ఫిల్, పిహెచ్. డి చేశారు.

డా. గరికిపాటి గురజాడగారు 23 ఏళ్ల యుక్త వయస్సులో వైకుంఠ ఏకాదశి, 2015 డిసెంబర్ 20, రోజున ప్రవచన రంగంలోకి ప్రవేశించి ఇప్పటివరకు 200కి పైగా ప్రవచనాలు చేశారు. గురజాడగారు తండ్రి అడుగుజాడల్లో నడుస్తూనే ప్రవచన రంగంపై తనదైన ముద్ర వేసేందుకు నిర్విరామంగా కృషి చేస్తున్నారు. చిన్న వయస్సులోనే మనుచరిత్ర, కాశీఖండం వంటి ప్రౌఢమైన కావ్యాలపై, రామాయణం, శ్రీమద్భాగవతం, శ్రీమద్దేవీభాగవతం, శివానందలహరి, సౌందర్యలహరి వంటి ఆధ్యాత్మిక అంశాలపై తెలుగు రాష్ట్రాల్లో వివిధ ప్రాంతాల్లో ప్రసంగించారు. అంతే కాకుండా వివిధ పాఠశాలల్లో, కళాశాలల్లో వ్యక్తిత్వ వికాసంపై ఎన్నో ప్రసంగాలు చేశారు.

అల్లసాని పెద్దన రచించిన మనుచరిత్ర కావ్యంపై డా. గురజాడగారు ఎం. ఫిల్ చేశారు. ‘మనుచరిత్ర: వ్యక్తిత్వవికాసం’ అనే అంశం పై వారి సిద్ధాంత వ్యాసాన్ని 2015లో తెలుగు శాఖ, హైదరాబాద్ కేంద్రీయ విశ్వవిద్యాలయానికి సమర్పించారు. మనుచరిత్ర కావ్యంపై పలుమార్లు ప్రసంగించి, మనుచరిత్ర- వ్యక్తిత్వ వికాసం అనే పుస్తకాన్ని 2020లో వెలువరించారు. గురజాడగారు ‘ఆంధ్ర మహాభారతం- సామాజికాంశాల పరిశీలన’ (ఆది పర్వం నుండి విరాట పర్వం వరకు) అనే అంశంపై పిహెచ్. డి పూర్తిచేసి తన సిద్ధాంత గ్రంథాన్ని 2020లో తెలుగు శాఖ, హైదరాబాద్ కేంద్రీయ విశ్వవిద్యాలయానికి సమర్పించారు.

కవిత్రయ భారతంపై ప్రత్యేకమైన ప్రసంగాలు చేసిన గురజాడగారు, తన యూట్యూబ్ ఛానల్ ద్వారా ‘భారతంలో చిన్న కథలు’ అనే ధారావాహికకి శ్రీకారం చుట్టి ఆ కథలు నిత్యజీవితానికి ఉపయోగపడే విధంగా ఆధునికమైన సమన్వయం చేస్తున్నారు.